RAIS SAMIA AZINDUA TUME MBILI KUTATHMINI MGOGORO WA NGORONGORO

 

Rais wa Jamhuri ya Muungano wa Tanzania, Dkt. Samia Suluhu Hassan, amezindua Tume ya Rais ya Kutathmini Masuala ya Mgogoro wa Ardhi katika Eneo la Hifadhi ya Ngorongoro pamoja na Tume ya Rais ya Kutathmini Zoezi la Uhamaji wa Hiari wa Wakazi wa eneo hilo. 

Uzinduzi huo umefanyika Ikulu jijini Dar es Salaam tarehe 20 Februari 2025.

Hatua hii ni utekelezaji wa ahadi aliyoitoa tarehe 1 Desemba 2024 mkoani Arusha alipokutana na viongozi na wawakilishi wa wananchi wa Ngorongoro na maeneo jirani.

Tume ya kwanza, inayohusika na tathmini ya mgogoro wa ardhi, itaongozwa na Jaji Dkt. Gerald Ndika, huku Tume ya pili, inayohusika na tathmini ya uhamaji wa hiari, itaongozwa na Mhandisi Musa Iyombe. 

Tume hizi zitajumuisha wawakilishi wa wananchi wa Ngorongoro na zitafanya kazi kwa muda wa miezi mitatu.

Akizungumza wakati wa uzinduzi, Rais Samia alisema, "Tume hizi ni hatua muhimu katika kutafuta suluhu ya kudumu kwa changamoto za wananchi wa Ngorongoro. Natumaini kazi yao italeta mwanga mpya katika suala hili."

Naye Jaji Dkt. Gerald Ndika, akieleza kuhusu majukumu ya tume yake, alisema, "Tutafanya kazi kwa weledi ili kuhakikisha kila upande unasikilizwa na suluhisho lenye maslahi mapana linapatikana."

Kwa upande wake, Mhandisi Musa Iyombe alisisitiza umuhimu wa kushirikiana na wananchi katika tathmini yao, akisema, "Tunahitaji ushirikiano wa karibu na wadau wote ili kupata taarifa sahihi zitakazosaidia kufikia maamuzi yenye manufaa kwa wote."

Uzinduzi wa Tume hizi umepongezwa na baadhi ya wawakilishi wa wananchi wa Ngorongoro, wakieleza kuwa wanatarajia kuona hatua za haraka na zenye kuzingatia haki katika mchakato wa tathmini.