Trump na Elon Musk Wavurugana Kisiasa Baada ya Uzinduzi wa Chama Kipya cha "American Party"

 

Mvutano mkubwa umeibuka kati ya Rais wa Marekani Donald Trump na bilionea maarufu Elon Musk kufuatia hatua ya Musk kuzindua chama kipya cha kisiasa kinachoitwa American Party. Hatua hii imeibua maoni yenye ukakasi kutoka kwa Trump, ambaye amemtaja Musk kuwa amepotea mwelekeo na "kutoka kwenye reli".

Akizungumza na waandishi wa habari katika uwanja wa ndege akielekea Washington kutoka klabu yake ya gofu ya New Jersey, Trump alikosoa vikali mpango huo wa Musk akisema, “Nadhani ni ujinga kuanzisha chama cha tatu. Siku zote umekuwa mfumo wa vyama viwili, na nadhani kuanzisha chama cha tatu kunaongeza mkanganyiko. Wahusika wa tatu hawajawahi kufanya kazi. Kwa hivyo anaweza kufurahia, lakini nadhani ni ujinga.”

Musk, ambaye ni mwanzilishi wa makampuni ya SpaceX na Tesla, alitangaza chama hicho Jumamosi, akisema kuwa malengo yake ni "kurejesha uhuru kwa wananchi wa Marekani" na kupinga kile alichokiita “mfumo wa chama kimoja” unaodhibiti siasa za Marekani. Ingawa hakuweka wazi iwapo tayari amekisajili chama hicho rasmi katika Tume ya Uchaguzi ya Marekani (FEC), hatua hiyo imechukuliwa kama jaribio la kuleta mageuzi makubwa katika mfumo wa kisiasa wa taifa hilo.

Wachambuzi wa siasa za Marekani wanasema kuwa ujio wa chama cha Musk unaweza kuwa na athari kubwa kwa chama cha Republican, ambacho kwa sasa kinamtegemea Trump kama mgombea mkuu katika uchaguzi wa urais wa mwaka 2028. Wengine wanatahadharisha kuwa chama hicho kipya kinaweza kugawanya kura za kihafidhina na hivyo kumpa nguvu mpinzani kutoka chama cha Democratic.

Katika ujumbe aliouandika kwenye mtandao wake wa Truth Social, Trump alieleza masikitiko yake kwa jinsi ambavyo Musk amejiweka mbali na siasa za muelekeo wa Republican, akisema, “Nimehuzunishwa kumtazama Elon Musk akitoka kabisa ‘nje ya reli’...”

Hili si mara ya kwanza kwa wawili hao kutofautiana. Tangu mwaka 2022, uhusiano kati yao umekuwa wa mashaka huku Musk mara kadhaa akionekana kumkosoa Trump kuhusu sera zake na nafasi yake katika ghasia za Capitol za Januari 6. Kwa upande mwingine, Trump mara kwa mara amekuwa akimtuhumu Musk kwa kuwa na msimamo wa kujiweka katikati kisiasa huku akitafuta maslahi binafsi.

Chama cha American Party, ambacho bado hakijaweka wazi viongozi wake, sera rasmi, au mikakati ya kampeni, kinaelezwa na wafuasi wake kama “harakati mpya ya kisiasa yenye lengo la kurejesha maadili ya kidemokrasia.” Hata hivyo, wapinzani wake wanahoji uhalisia wa mafanikio ya chama hicho katika mazingira ya kisiasa ya Marekani yanayotawaliwa na vyama viwili vikuu.

Endapo Musk ataendelea mbele na mradi huu, uchaguzi wa katikati ya muhula mwaka 2026 unaweza kuwa jaribio la kwanza la chama hicho kipya, na huenda ikawa fursa ya kupima ushawishi wa Musk kama kiongozi wa kisiasa – nje ya tasnia za teknolojia na biashara alizozoeleka.

Wakati mustakabali wa chama hicho bado haujajulikana, kilicho wazi kwa sasa ni kwamba siasa za Marekani zinaingia katika sura mpya ya ushindani ambayo inaweza kuathiri pakubwa mizani ya mamlaka na nguvu ya kisiasa nchini humo.