Panya wa Kiume kutoka Tanzania Akivunja Rekodi ya Dunia kwa Kugundua Mabomu ya Ardhini

 

Panya mmoja wa kiume anayenusa mabomu ya ardhini nchini Cambodia ameweka rekodi mpya ya dunia, kwa kuwa panya wa kwanza kufichua zaidi ya mabomu mia moja ya kutegwa ardhini na mabaki mengine ya zana za kivita ambayo yanaweza kusababisha maafa. 

Ronin, panya kutoka Tanzania, amethibitisha umuhimu wa wanyama hawa katika mchakato wa kutoa msaada wa kipekee katika maeneo yaliyoathiriwa na vita.

Shirika la kutoa misaada ya kutegeua mabomu yaliyotegwa ardhini lililo na makao yake nchini Ubelgiji, la APOPO, limetangaza kuwa Ronin amefanya kazi kubwa katika jimbo la Preah Vihear, kaskazini mwa Cambodia, kwa zaidi ya miaka mitatu. 

Katika kipindi hicho, amegundua mabomu 109 na vifaa vingine vya kivita vyenye hatari. 

Mafanikio haya yamefanya Ronin kuwa panya wa kwanza kufikia rekodi hiyo, akivunja ile ya awali iliyoshikiliwa na panya mwingine maarufu, Magawa, ambaye pia alitoka Tanzania.

Magawa aligundua mabomu 71 katika kipindi cha miaka mitano kabla ya kustaafu mwaka 2021. 

Magawa alitunukiwa medali ya dhahabu kwa ushujaa wake, lakini alifariki mwaka 2022. Kwa sasa, Ronin ameendelea na jukumu hili la kugundua mabomu kwa ufanisi, huku akiwa na uwezo wa kufanya kazi kwa miaka mingine miwili, kulingana na taarifa za APOPO.

Panya huyu mwenye umri wa miaka mitano amepewa taji la Rekodi za Dunia za Guinness kwa kugundua mabomu mengi zaidi ya ardhi. 

"Mafanikio yake ya kipekee yamemfanya apate taji la Rekodi za Dunia za Guinness kwa kuwa panya aliyegundua mabomu mengi ya ardhini," ilisema taarifa ya APOPO.

Cambodia inakabiliana na madhara ya mabomu yaliyosalia kutoka kwa vita vya wenyewe kwa wenyewe vilivyomalizika mwishoni mwa miaka ya tisini. 

Maelfu ya mabomu ya kutegwa ardhini bado yapo kwenye maeneo mbalimbali, yakitishia maisha ya raia, hasa watoto. Vifo vinavyosababishwa na milipuko ya mabomu ni jambo la kawaida, na takribani vifo 20,000 vimetokea tangu 1979. 

Watoto wawili waliuawa mwezi Februari mwaka huu wakati guruneti lililokuwa limeachwa kutoka kwa vita lililipuka karibu na makazi yao kaskazini magharibi mwa mkoa wa Siem Reap.

Nchini Tanzania, shirika la APOPO linatumia panya wa kunusa pia katika kugundua magonjwa kama kifua kikuu, ambapo panya hawa hutumika kutambua watu wanaougua ugonjwa huu kwa haraka na ufanisi. 

Hii ni sehemu ya juhudi za shirika hili kutoa huduma muhimu ya kiafya na usalama kwa watu wa maeneo mbalimbali.

Kwa hivyo, panya hawa wa kunusa ni wanyama wa kipekee na mashujaa, kwani wanasaidia katika kupambana na hatari zinazotokana na vita, silaha zilizotegwa ardhini na magonjwa hatari. 

Ufanisi wa Ronin unathibitisha uwezo wa wanyama hawa katika kutoa msaada muhimu na kuokoa maisha duniani kote.

Chanzo; BBC