TAZAMA HATARI YA MAJENGO DUNGA KARIAKOO: RAIS SAMIA, WATAALAMU WANALALAMIKIA UBORA WA MAJENGO

 

Tarehe 16 Novemba 2024, jengo la ghorofa nne lililopo Kariakoo, Dar es Salaam, liliporomoka na kusababisha vifo vya watu takribani 20, tukio ambalo limetikisa taifa na kuibua mjadala kuhusu ubora wa majengo katika maeneo ya biashara kama Kariakoo. 

Rais wa Tanzania, Samia Suluhu Hassan, alizuru eneo la tukio na kutoa maoni kuhusu hali ya majengo ya Kariakoo, akisema kuwa ni wazi jengo hilo halikujengwa kwa viwango stahiki na kuahidi kwamba uchunguzi utatolewa ili kujua ubora wa majengo yote ya Kariakoo.

Rais Samia alieleza kuwa, tukio hili linaonyesha mapungufu katika utekelezaji wa viwango vya ujenzi na uwajibikaji wa mamlaka zinazohusika. 

"Jengo lile halikutazamwa ubora wake wakati wa ujenzi," alisema Rais Samia. Aliwataka wahusika wote kuzingatia taratibu na kuhakikisha kuwa matukio ya aina hii hayatokei tena.

Tukio hili linakuja baada ya miongo kadhaa ya mijadala kuhusu ubora wa majengo katika maeneo ya jiji kuu la Dar es Salaam, hasa katika soko la Kariakoo, ambalo linatajwa kuwa soko kubwa zaidi katika Ukanda wa Afrika Mashariki. 

Wataalamu wa ujenzi nchini wanashauri mamlaka kuzingatia mapendekezo yatakayoweza kuzuia majanga kama haya, wakieleza kwamba ubora hafifu na mabadiliko ya matumizi ya majengo yanaweza kusababisha majengo kuanguka.

Mhandisi Innocent Ben alisema kuwa mabadiliko ya matumizi ya majengo, kama vile yale yaliyokuwa yakijengwa kwa ajili ya makazi lakini sasa kutumika kwa shughuli za biashara, ni hatari. 

"Majengo yaliyojengwa kwa matumizi maalum yanaweza kuwa na matatizo makubwa ikiwa yatatumika kwa madhumuni tofauti," alisema Ben.

Pia, Mhandisi Joseph Magida alieleza kuwa ni lazima hatua za kudumu zichukuliwe ili kuboresha ubora wa majengo, na kwamba serikali inapaswa kuchukua hatua madhubuti dhidi ya wahusika wanaovunja sheria za ujenzi. Magida aliongeza kuwa Kariakoo, ambayo ilianza kama eneo la makazi, sasa limejaa majengo ya biashara yaliyojengwa kiholela, jambo linalosababisha hatari kubwa.

Mbali na majengo yasiyokuwa na ubora, Profesa Anna Tibaijuka, Waziri wa zamani wa Ardhi, alikosoa utendaji wa serikali katika kushughulikia mipango miji. Alieleza kuwa sheria za mipango miji zimekiukwa, na majengo mengi yanajengwa kwenye viwanja visivyokidhi viwango vinavyotakiwa. 

Alisema kuwa ushauri uliopewa na wataalamu ulipuuziliwa mbali kutokana na shinikizo kutoka kwa wawekezaji.

Wakati huo, Waziri Mkuu Kassim Majaliwa alitangaza kuwa serikali imeunda tume ya watu 19 itakayoongozwa na Bregedia Jenerali Hosea Ndagala, ili kuchunguza ubora wa majengo na kutoa ushauri kuhusu hatua za kuchukuliwa. 

Majaliwa alisisitiza kuwa tume hiyo itatoa mapendekezo ambayo serikali itatekeleza, na kama inahitajika, majengo yaliyojengwa chini ya viwango vitabomolewa ili kuepusha madhara zaidi.

Pamoja na hatua hizi, wataalamu na wananchi wanaitaka serikali kuhamasisha utekelezaji wa mapendekezo ya kitaalamu na kuwajibisha watu wote waliohusika na ujenzi wa majengo duni. Mtaalamu wa ujenzi, Innocent Ben, alisema kuwa uchunguzi unahitajika ili kubaini ni vigezo gani vilikiukwa na ni hatua gani za kisheria zitachukuliwa dhidi ya wahusika.

Kariakoo, ambayo ni kitovu cha biashara nchini Tanzania, inahitaji suluhisho la kudumu la kuboresha majengo na kuboresha usimamizi wa maeneo ya ujenzi. 

Katika kukabiliana na changamoto hizi, serikali inapaswa kuzingatia ushauri wa wataalamu na kuhakikisha kuwa ubora wa majengo unazingatiwa ili kuepusha majanga kama haya yatakayoweza kuleta madhara makubwa kwa wananchi.