Kizza Besigye Afikishwa Mahakama ya Kijeshi Uganda

 

Mwanasiasa mashuhuri wa upinzani nchini Uganda, Dk. Kizza Besigye, amefikishwa katika Mahakama ya Kijeshi ya Makindye, Kampala, baada ya ripoti za kutoweka kwake jijini Nairobi, Kenya, mwishoni mwa juma.  

Besigye, 68, ambaye ni daktari na mkosoaji maarufu wa Rais Yoweri Museveni, alifikishwa mahakamani Jumatano chini ya ulinzi mkali wa kijeshi. 

Alifikishwa pamoja na Hajji Lutale Kamulegeya, mwanasiasa mwingine wa upinzani.  

Mawakili wake, wakiongozwa na Erias Lukwago, walisema Besigye anakabiliwa na mashtaka ya kumiliki bunduki mbili na kuomba msaada wa vifaa kutoka Uganda, Ugiriki, na mataifa mengine kwa lengo la kuhatarisha usalama wa taifa. 

“Besigye amekana mashtaka haya na kupinga mamlaka ya mahakama hiyo kumhukumu. Amepelekwa rumande katika Gereza la Luzira hadi Desemba 2,” alisema Lukwago.  

Mke wa Besigye, Winnie Byanyima, ambaye ni Mkurugenzi Mtendaji wa Mpango wa Pamoja wa Umoja wa Mataifa wa Kupambana na Ukimwi (UNAIDS), aliitaka serikali ya Uganda kumwachia mumewe mara moja. 

Kupitia chapisho kwenye X (zamani Twitter), Byanyima alisema: “Nimearifiwa kuwa yuko katika gereza la kijeshi Kampala. Tunamtaka aachiliwe mara moja. Yeye si mwanajeshi, kwa nini anashikiliwa katika gereza la kijeshi?”  

Jeshi la Uganda halijatoa tamko lolote kuhusu tukio hilo. Hata hivyo, Waziri wa Habari wa Uganda, Chris Baryomunsi, alisema serikali haihusiki na utekwaji nyara wowote. 

“Kukamatwa kwake Kenya hakupaswi kuwa suala kubwa. Tunachohakikishia ni kwamba serikali haiwazuilii watu kwa muda mrefu bila mawasiliano,” alisema katika mahojiano na shirika la utangazaji la umma nchini Uganda.  

Kwa upande mwingine, Katibu Mkuu wa Mambo ya Nje wa Kenya, Korir Singoei, alisema serikali ya Kenya haikuhusika katika tukio hilo.  

Katika tukio linalohusiana, wanachama 36 wa chama cha Forum for Democratic Change (FDC) walikamatwa Kenya Julai mwaka huu na kusafirishwa hadi Uganda, ambako walifunguliwa mashtaka ya ugaidi. Wanaharakati hao walikana mashtaka hayo na kudai waliteswa wakiwa kizuizini.  

Besigye, ambaye aliwahi kuwa daktari wa kibinafsi wa Rais Museveni wakati wa vita vya wenyewe kwa wenyewe nchini Uganda miaka ya 1980, ameendelea kuwa mpinzani mkubwa wa kisiasa wa kiongozi huyo aliye madarakani tangu 1986. 

Besigye amegombea urais mara nne dhidi ya Museveni na kushindwa, huku akipinga matokeo kwa madai ya udanganyifu na vitisho kwa wapiga kura.  

Serikali ya Museveni kwa miaka mingi imekuwa ikikabiliwa na shutuma za ukiukwaji wa haki za binadamu, zikiwemo kukamatwa kwa wanasiasa wa upinzani, mateso, na mauaji ya kiholela. 

Hata hivyo, mamlaka nchini Uganda zimekanusha tuhuma hizo, zikisisitiza kuwa waliokamatwa wanashughulikiwa kwa mujibu wa sheria na taratibu za kimahakama.