AFCON 2027: Serikali Yapiga Hatua Kubwa Miundombinu ya Barabara Arusha, Bilioni 27 Zawekwa Mezani

ARUSHA: Maandalizi ya michuano ya Kombe la Mataifa ya Afrika (AFCON) 2027 yameshika kasi jijini Arusha, huku Serikali ikisisitiza kukamilika kwa wakati kwa miradi ya kimkakati ya barabara itakayohudumia mashindano hayo makubwa barani Afrika.

Akizungumza Aprili 17, 2026, wakati wa ziara ya ufuatiliaji wa miradi hiyo, Waziri wa Ujenzi, Abdallah Ulega, amebainisha kuwa ujenzi wa miundombinu ni kipaumbele cha kimkakati cha Rais Dkt. Samia Suluhu Hassan ili kuhakikisha Tanzania inatoa taswira ya kipekee wakati wa michuano hiyo.

 Miradi ya Kilometa 13 Kukamilika Mapema

Mtendaji Mkuu wa TANROADS, Mhandisi Mohamed Besta, ameeleza kuwa mkandarasi China Civil Engineering Construction Company (CCECC) ameanza kazi rasmi tangu Aprili 10, 2026. Ingawa mradi wote wa barabara ya Mbauda – Losinyai unatarajiwa kukamilika mwaka 2029, kipaumbele kimewekwa kwenye kipande cha kilometa 13 ambacho lazima kikamilike kabla ya AFCON 2027 kuanza.

Mchanganuo wa Barabara Hizo:

* Mbauda – Bondeni City (km 9): Itajengwa kwa njia nne na kuwekwa taa.

* Tanganyika Packers – Makutano ya Arusha Bypass (km 4): Itakamilika mapema kurahisisha usafiri.

* Soko la Kilombero – Msikiti wa Ngarenaro – Kisongo (km 9.1): Itajengwa kwa njia nne kuelekea Kisongo.

Waziri Ulega aliongeza kuwa barabara hizi si tu kwa ajili ya mashindano, bali zitasaidia kutatua kero ya muda mrefu ya mafuriko jijini Arusha kutokana na ujenzi wa mitaro mikubwa ya kisasa.

 Bilioni 27 Zaidhinishwa, Mkandarasi Alipwa

Katika kuhakikisha kazi haiingiliwi na vikwazo vya kifedha, Rais Dkt. Samia Suluhu Hassan ameidhinisha jumla ya shilingi bilioni 27. Kati ya hizo, bilioni 17.6 tayari zimekwishalipwa kwa mkandarasi kama malipo ya awali, huku bilioni 10 zikitengwa kwa ajili ya kuwafidia wananchi waliopisha mradi huo.

 Waziri Mkuu Mwigulu Nchemba Asisitiza Amani

Katika ziara hiyo, Waziri Mkuu Dkt. Mwigulu Nchemba amewataka Watanzania kuendelea kulinda na kudumisha amani, akieleza kuwa miradi mikubwa kama hiyo ya maendeleo haiwezi kutekelezeka bila utulivu.

"Tuwe makini na watu wanaohamasisha uvunjifu wa amani. Lazima tulinde amani ya nchi yetu ili tuweze kuendeleza shughuli hizi za maendeleo," alisisitiza Dkt. Mwigulu wakati akihutubia wananchi katika eneo la Kona ya Mbauda.

• 

Kukamilika kwa barabara hizi kutabadili sura ya Jiji la Arusha, kupunguza msongamano, na kuweka mazingira rafiki kwa wageni na wenyeji wakati wa shamrashamra za AFCON 2027.