Mzozo wa Israel na Iran Wazidi Kupamba Moto: Israel Yatishia Viongozi wa Tehran, Dunia Yatoa Wito wa Utulivu

Waziri wa Ulinzi wa Israel, Israel Katz, amesema Alhamisi kuwa amewaagiza wanajeshi wa taifa hilo kuzidisha mashambulizi dhidi ya Iran, akisisitiza dhamira ya Israel ya "kudhoofisha" uongozi wa Tehran kufuatia mashambulizi ya makombora yaliyoelekezwa kwenye maeneo ya Israel, ikiwemo karibu na Hospitali ya Soroka.

Akizungumza na waandishi wa habari mjini Holon, karibu na Tel Aviv, Katz alisema:

“Khamenei ametangaza wazi kwamba anataka Israel iangamizwe, yeye binafsi ametoa agizo la kufyatua risasi hospitalini... Anachukulia kuangamizwa kwa taifa la Israeli kuwa lengo lake. Mtu wa namna hii hapaswi kuendelea kuwepo.”

 

Hata hivyo, hakufafanua iwapo alimaanisha kiongozi huyo wa kidini wa Iran, Ayatollah Ali Khamenei, aondolewe mamlakani au kuuawa.

Kwa mujibu wa vyombo vya habari vya serikali ya Iran, kombora hilo lililenga kituo cha kijeshi kilichoko karibu na hospitali, si hospitali yenyewe kama inavyodaiwa na Israel.

Katika hatua ya kuonesha wasiwasi wa kimataifa, mawaziri wa mambo ya nje wa Ufaransa, Ujerumani na Uingereza wanatarajiwa kukutana Ijumaa hii mjini Geneva na Waziri wa Mambo ya Nje wa Iran, Abbas Araghchi, kwa mazungumzo ya dharura kuhusu suala la nyuklia na kujaribu kupunguza mivutano.

Mkutano huo unakuja wakati mataifa mengi yakiendelea kuwaondoa raia wao kutoka Israel na Iran, kufuatia ongezeko la mashambulizi baina ya nchi hizo mbili.

Rais wa Urusi Vladimir Putin na Rais wa China Xi Jinping walizungumza kwa njia ya simu Alhamisi, wakielezea wasiwasi wao juu ya hali inayoendelea.

Katika taarifa ya pamoja, viongozi hao walilaani vikali mashambulizi ya Israel dhidi ya Iran.

Rais Putin alisema:

“Suluhisho la mzozo huu haliwezi kupatikana kupitia silaha bali kwa njia ya kidiplomasia.”

Naye msemaji wa Kremlin, Dmitry Peskov, alisema kuwa kuingilia kwa Marekani katika mzozo huo kutafanya hali kuwa mbaya zaidi:

“Marekani kuingilia kati mzozo kati ya Israel na Iran kutasababisha hali kuwa mbaya zaidi,” alisema Peskov alipoulizwa na shirika la habari la serikali ya Urusi, TASS.

Taarifa hiyo ilifuatia onyo la Naibu Waziri wa Mambo ya Nje wa Urusi, Sergei Ryabkov, aliyesema:

“Marekani isitolee msaada wa kijeshi kwa Israel. Hii inaweza kufanya hali kuwa mbaya zaidi.”

Mashambulizi ya Israel pia yamekosolewa vikali na Wizara ya Mambo ya Nje ya Urusi ambayo ilisema:

“Mashambulizi haya ni ya kijinga na hayachochewi na chochote.”

Katika hatua ya kuimarisha ushirikiano wao, mapema mwaka huu, Rais Putin na Rais wa Iran, Masoud Pezeshkian, walitia saini mkataba wa kina wa ushirikiano wa kimkakati. Kifungu cha kwanza cha mkataba huo kinasisitiza dhamira ya mataifa hayo kuendeleza ushirikiano katika sekta za ulinzi na usalama.

Iran imekuwa ikiipatia Urusi ndege zisizo na rubani aina ya Shahed, ambazo zimetumika katika vita vya Ukraine, hatua inayodhihirisha uhusiano wa karibu wa kijeshi kati ya Tehran na Moscow.

Wakati huo huo, aliyekuwa Rais wa Marekani, Donald Trump, amezidi kushinikiza Iran isalimu amri.

“Iran haina budi kujisalimisha bila masharti,” alisema Trump, huku ripoti zikisema kuwa anafikiria kuishambulia Iran kijeshi.

Katika hali hii ya sintofahamu, dunia inatazama kwa hofu jinsi mgogoro wa Mashariki ya Kati unavyozidi kuingia katika hatua za hatari, huku suluhisho la amani likionekana kuwa mbali.