MUSEVENI NA MKEWE WAOMBA MSAMAHA KWA MAKOSA YA UONGOZI:

 MUSEVENI NA MKEWE WAOMBA MSAMAHA KWA MAKOSA YA UONGOZI:“TUNATAKA UREJESHO WA NEEMA YA MUNGU”

KAMPALA, UGANDA – 

Rais wa Uganda Yoweri Kaguta Museveni na mkewe Janet Museveni wameomba msamaha hadharani kwa mara ya nadra sana, wakikiri kuwa wapo makosa yaliyofanyika chini ya uongozi wao, yakiwemo ya ufisadi, kujitenga kwa raia, na changamoto za uwajibikaji.

Wakiwa wamesimama pamoja katika Mkutano wa Injili uliofanyika kwenye Uwanja wa Uhuru wa Kololo, viungani mwa jiji la Kampala, viongozi hao walizungumza mbele ya maelfu ya waumini kutoka maeneo mbalimbali nchini Uganda na kutumia jukwaa hilo kama nafasi ya kuomba radhi kwa wananchi wao.

“Kama viongozi wakuu wa National Resistance Movement (NRM), tunawajibika kwa makosa yote tuliyofanya sisi wenyewe, mawakala wetu na wawakilishi wetu. Kwa hiyo, tunasimama hapa kutubu na kuomba radhi hasa kwa wananchi wa Buganda na nchi nzima. Tunaomba urejesho na upendeleo,” walisema Rais Museveni na mkewe Janet Museveni katika taarifa yao ya pamoja.

Katika hotuba yake, Rais Museveni aliipongeza jamii ya kidini nchini Uganda kwa mchango mkubwa waliouonyesha katika kujenga taifa lenye maadili na mshikamano.

“Naipongeza sana jamii ya kidini, hasa makanisa, kwa hatua kubwa ya mabadiliko. Zamani ilikuwa sehemu ya tatizo, lakini leo hii ni msingi wa amani, uwajibikaji na maendeleo ya kiroho. Mungu arejeshe neema ambayo tulikuwa nayo mwanzoni na kutuunganisha tena kwa umoja wetu wa kitaifa na kujitolea kwa mabadiliko ya kijamii na uchumi wa nchi yetu pamoja,” alisema Rais Museveni.

Mkutano huo wa kiroho ulihudhuriwa na viongozi wa dini, wanasiasa, na raia wa kawaida kutoka kila pembe ya nchi. Lengo kuu la mkutano huo lilikuwa ni kuomba amani, kusihi mabadiliko ya kitaifa na kuunganisha wananchi kupitia imani na toba.

Kwa mujibu wa wachambuzi wa kisiasa nchini Uganda, tukio hilo linaweza kuwa mwanzo wa sura mpya katika uhusiano kati ya uongozi wa taifa na raia wake, hasa katika kipindi ambapo kumekuwepo na malalamiko kuhusu hali ya uchumi, ukosefu wa ajira na ufisadi serikalini.

Chanzo: [DW Kiswahili, Mei 2025]