Mkuu wa Shule Akamatwa kwa Kumbaka Mwanafunzi, Watu 10 Wanaswa kwa Ujangili

Mkoa wa Morogoro umeendelea kuwa na matukio makubwa ya uhalifu baada ya Jeshi la Polisi kuonyesha nguvu katika kukabiliana na vitendo vya kihalifu. 

Tukio kubwa linaloshika headlines ni la Mwalimu Mkame Living Mwaisumo (30), ambaye ni Mkuu wa Shule ya Sekondari Zombo, wilayani Kilosa, kushikiliwa na polisi kwa tuhuma za kumbaka mwanafunzi wa kidato cha pili mwenye umri wa miaka 16.

Mwalimu Akamatwa kwa Kumbaka Mwanafunzi

Kamanda wa Polisi Mkoa wa Morogoro, SACP Alex Mkama, amethibitisha tukio hilo akisema kwamba lilitokea Machi 19, 2025, ndani ya ofisi ya mwalimu mkuu, wakati ambapo mwanafunzi huyo alikuwa ameagizwa na mkuu wake kupeleka mwongozo wa somo (lesson plan). Kamanda Mkama alieleza kwamba uchunguzi wa awali unaonyesha kuwa tukio hili limetokana na mmomonyoko wa maadili, huku uchunguzi wa kina ukiendelea ili kuhakikisha hatua za kisheria zinafikiwa dhidi ya mtuhumiwa.

Dereva Aiba Mafuta na Kuchoma Lori, Ashikiliwa na Polisi

Katika tukio lingine, Jeshi la Polisi limemkamata Abubakar Adam Mwichangwe (29), mkazi wa Tabata Kinyerezi, Dar es Salaam, kwa tuhuma za wizi wa mafuta ya dizeli lita 35,700 na kuchoma lori alilokuwa akiendesha ili kuonekana kama ajali. Kamanda Mkama amethibitisha kukamatwa kwa mtuhumiwa huyo Machi 19, 2025, baada ya kutekeleza tukio hili la wizi na uharibifu wa mali Machi 16, 2025. Mafuta hayo yenye thamani ya Tsh 77,112,000 yalikuwa yakisafirishwa kwenda Lubumbashi, DRC kupitia kampuni ya Meru. Polisi walibaini kuwa dereva huyo alishirikiana na mameneja wa vituo vya mafuta ili kuuza mafuta hayo, kisha akachoma lori eneo la Misufini, Kilosa, akijaribu kuhalalisha uharibifu huo kama ajali ya moto.

Ujangili wa Wanyamapori: Polisi Wawakamata 10, Wakitaifisha Silaha na Viungo vya Wanyama

Katika juhudi za kupambana na ujangili, polisi kwa kushirikiana na TANAPA wamefanikiwa kuwakamata watu 10 wanaodaiwa kujihusisha na ujangili wa wanyamapori. Watu hawa walikamatwa katika msako mkali uliofanyika kati ya Machi 14 hadi 19, 2025, ambapo silaha mbalimbali na viungo vya wanyama vilikamatwa, ikiwa ni pamoja na silaha za moto, viungo vya wanyama na vifaa vingine vya uwindaji haramu. Kamanda Mkama amesema kuwa tukio hili linadhihirisha juhudi za vyombo vya usalama katika kuzuia vitendo vya ujangili na kuhakikisha wahusika wanakamatwa.

Majina ya watuhumiwa wa ujangili ni pamoja na:

• Safari Paschal Tamba (23) – Mkazi wa Tanga
• Jacob Amori Chigange (50) – Mkazi wa Melela
• Mathias John Ndalu (20) – Mkazi wa Melela
• Hussein Rashid (66) – Mkazi wa Melela
• Athuman Robert Matonya (48) – Mkazi wa Vianzi-Mlandizi
• Ismail Omary Mahyoro (75) – Mkazi wa Tandika, Dar es Salaam
• Shaban Mohamed Kalesela (50) – Mkazi wa Mkundi
• Bakari Haruna Nzilie (53) – Mkazi wa Melela-Mlandizi
• Abdulkharim Ibrahim Mashaka (55) – Mkazi wa Kilombero
• Nestory Gabriel Mkami (58) – Mkazi wa Melela-Mlandizi

Wito kwa Wananchi Kushirikiana na Vyombo vya Usalama

Jeshi la Polisi limeendelea kutoa wito kwa wananchi kushirikiana na vyombo vya usalama katika mapambano dhidi ya uhalifu, ujangili, na vitendo vya mmomonyoko wa maadili, huku wakiahidi kuwa wahusika wote wa matukio haya watafikishwa mbele ya sheria.

Kamanda Mkama amesisitiza kuwa juhudi za kukabiliana na uhalifu zinahitajika kwa ushirikiano wa jamii nzima ili kuhakikisha amani na utulivu vinarejea katika maeneo yaliyoathiriwa.