Kayombo Awaonya Wenyeviti wa Mitaa Kuepuka Ujenzi Holela na Maamuzi ya Kibabe

Mkurugenzi wa Jiji la Arusha, John Kayombo, apiga Marufuku Ujenzi Holela na Maamuzi ya Kibabe na Awataka Wenyeviti wa Mitaa Kuhudumia Wananchi kwa Weledi

Aidha, amewaonya wenyeviti wa mitaa na wajumbe wa serikali za mitaa kuacha kufanya maamuzi ya kibabe, ikiwemo kuuza maeneo kiholela, na kuwataka wafanye kazi kwa weledi na kutii sheria za nchi. 

Kayombo amesisitiza kuwa viongozi hao wanapaswa kusimamia miradi ya maendeleo kwa umakini na kuzingatia maslahi ya wananchi kwa ujumla.

Akizungumza baada ya viongozi hao kula kiapo rasmi mbele ya Hakimu Mkazi wa Mahakama ya Mwanzo, Arusha mjini, Salma Athumani Mwamende, Kayombo aliwatahadharisha wenyeviti 924 na wajumbe wao kuwa nafasi waliyopewa ni adhimu na kwamba wanapaswa kutekeleza majukumu yao kwa ufanisi. 

Viongozi hao, ambao ni wa mitaa 154, wajumbe wa wanawake 308, na wajumbe wa kundi mchanganyiko 462, walichaguliwa kwenye uchaguzi mdogo wa serikali za mitaa uliofanyika Novemba 27, 2024.

Kayombo aliwahimiza viongozi hawa wa mitaa kutokuwa chanzo cha migogoro na kutekeleza maamuzi yao kwa busara ili kuepusha mivutano na machafuko. 

Alisisitiza kuwa wanapaswa kujiepusha na kuuza ardhi kiholela, jambo ambalo linaweza kuhatarisha ustawi wa jamii na usalama wa jiji la Arusha.

“Mmepata nafasi hii adhimu mliyo aminiwa na wananchi. Sitaki kusikia nyie ndiyo chanzo cha migogoro. Mmetoka huko katika vyama vyenu sasa mpo chini yangu. Ninataka mkawe chachu ya utatuzi wa changamoto za wananchi,” alisisitiza Kayombo.

Aidha, Mkurugenzi Kayombo aliwakumbusha viongozi hao umuhimu wa kusimamia ulinzi na usalama katika maeneo yao, akieleza kuwa Arusha ni kitovu cha utalii na kwamba ulinzi bora utachangia kuimarika kwa uchumi na kuwa salama kwa wageni.

Mkurugenzi Kayombo pia alisisitiza juu ya umuhimu wa kuzuia ujenzi holela, akieleza kuwa hii ni njia mojawapo ya kulinda jiji la Arusha na kudumisha usalama na mazingira bora ya makazi. 

Viongozi wa mitaa walikubali maelekezo hayo na kuahidi  watatimiza majukumu yao kwa weledi na kwa kuzingatia sheria.

Kwa upande mwingine, Kayombo aliahidi kutoa semina ya siku mbili kwa viongozi hao ili kuwapa uelewa wa miongozo ya kazi na kuwapa vifaa vya kisasa vitakavyowawezesha kutekeleza majukumu yao kwa ufanisi mkubwa. 

Hii ni hatua muhimu katika kuhakikisha kuwa viongozi hao wana uwezo wa kutoa huduma bora kwa wananchi na kusimamia miradi ya maendeleo kwa ufanisi.

Kwa ujumla, kauli ya Mkurugenzi Kayombo inatoa mwito kwa viongozi wa mitaa kuwa ni lazima waonyeshe ufanisi, uadilifu, na kujitolea katika kuwatumikia wananchi ili kuhakikisha maendeleo yanapatikana katika jiji la Arusha na kuimarisha usalama na utulivu wa jamii.