MWAJIRI ARUSHA ADAIWA KUCHAPA WAFANYAKAZI NA UNAODAIWA MKIA WA FARU

WAFANYAKAZI wa kampuni ya Kilimanjaro MilleniumPrinters LTD

inayojishughulisha na utozaji wa ushuru wa maegesho ya magari kwenye

maeneo mbalimbali ya jiji la Arusha wamelalamikia vitendo vya

unyanyasaji walivyodai kufanyiwa na uongozi wa kampuni hiyo ikiwemo

kuchapwa na mkia wa faru.

Aidha wafanyakazi hao wamedai kuwa walianza kazi kwenye kampuni hiyo

mwanzoni mwa mwezi huu lakini mpaka sasa uongozi wa kampuni hiyo

hautaki kuwaeleza watawalipa mshahara kiasi gani huku wakiwa

wanafanyishwa kazi kuanzia saa 12 asubuhi na muda wa kutoka kazini

ukiwa haujulikani kwani wakati mwingine hukaa mpaka saa tano usiku.

Wakiongea hivi karibuni mbele za ofisi za kampuni hiyo zilizopo eneo

la Kona Nairobi ,Ngarenaro jijini hapa wafanyakazi hao walidai kuwa

waliamua kugoma kufanya kazi ili kushinikiza uongozi kufanyia kazi

madai yao ili waweze kuamua endapo waendelee na kazi au waache.

Akiongea kwa niaba ya wenzake, Ally Abas alisema kuwa wao wamekuwa

wakifanya na kampuni mbalimbali zinazopata tenda ya kukusanya ushuru

kuanzia miaka ya nyuma ambapo kwenye makampuni hayo yote hawakuwahi

kufanyiwa vitendo vya unyanyasaji kama wanavyofanyiwa na kampuni hiiya

sasa.

Alisema kuwa inashangaza kuona wakati hata hawajui mshahara utakuwa

kiasi gani lakini wameambiwa kuwa atakaeingia kazini baada ya saa 12

asubuhi  kamili atakatwa shilingi 2,000 kwenye mshahara.

“ Hapa tuko zaidi ya wafanyakazi 300 tukishafunga kazi saa 12 jioni

tunarudi hapa ofisini kwa ajili ya kufanya mahesabu, kutokana na wingi

wetu wakati mwingine unakaa mpaka saa tano usiku na hatupewi hata

nauli. Kuna mgambo hapa (Thomas) anatupanga kwenye foleni kwa

kutuchapa na mkia wa faru kwa kweli huu ni unyanyasaji wa hali ya juu”

alilalamika Ally Bakari.

Aidha wafanyakazi hao wamelalamikia kupewa malengo makubwa ya

makusanyo huku wengine wakipangiwa kukusanya maeneo ambayo magari

hayaruhusiwi kuegeshwa wakitolea kuwa wanatakiwa kukusanya mbele ya

benki kuu (BOT) wakati eneo hilo haliruhusiwi kuegesha magari.

Walidai kuwa wengine wamepangiwa kukusanya ushuru kwenye kituo cha

kati cha polisi, eneo la mbele ya chumba cha kuhifadhia maiti cha

hospitali ya mkoa ya Mount Meru, mbele ya  kituo cha mikutano cha

kimaifa cha Arusha, (AICC) ambapo hakuna eneo la kuegesha magari na

eneo mbele ya hoteli ya Impala ambapo hakuna eneo la maegesho ya

magari zaidi ya mzunguko wa magari ya kijenge.

Kwa upande wake mkurugenzi wa kampuni hiyo, Thomas Munisi alipofuatwa

ofisini na Tanzania Daima akitakiwa kutolea ufafanuzi madai hayo

aliomba apewe muda ili aweze kuwasiliana na watendaji wake kujua

undani wa madai hayo.