MWIGULU; IAA CHUO PEKEE NCHINI KINACHOTAMBULIKA NA ACCA

Rais wa jamhuri ya Muungano wa Tanzania na Amiri Jeshi Mkuu, Samnia Suluhu Hassan Aprili 17, 2021 akiwatunuku wahitimu 143 wa Shahada ya Kwanza ya Sayansi ya kijeshi  inayotolewa na Chuo cha Mafunzo ya Kijeshi Monduli kwa kushirikiana na Chuo cha Uhasibu Arusha.

Rais wa jamhuri ya Muungano wa Tanzania na Amiri Jeshi Mkuu, Samia Suluhu Hassan akiwa katika picha ya pamoja na wakufunzi wa Chuo cha Mafunzo ya Kijeshi Monduli na Chuo cha Uhasibu Arusha mara baada ya kuwatunuku wahitimu 143 wa Shahada ya Kwanza ya Sayansi ya kijeshi  katika  katika viwanja vya Ikulu,Dodoma 

 

WAZIRI  wa Fedha na Mipango, Dkt. Mwigulu  Nchemba amesema Chuo cha Uhasibu Arusha, (IAA) ni kituo pekee nchini kinachotambuliwa kimataifa kuwa Kituo cha Mafunzo ya Bodi ya Wahasibu wa Kimataifa, (ACCA).

Aliyasema hayo jana Aprili 17, 2021 wakati wa hafla ya kutunuku kamisheni kwa maafisa wa jeshi la Wananchi nchini, (JWTZ) ambapo hiyo ni mara ya kwanza kwa  sherehe hizo kufanyika kwenye Ikulu ya Chamwino, jijini Dodoma.

Mwigulu alisema  IAA ilitambuliwa rasmi na ACCA, Februari mwaka huu ambapo kinakuwa miongoni mwa vyuo vitatu vyenye usajili huo  kwa ukanda wa nchi za  Afrika Mashiriki.

 

Naye Mkuu wa Chuo cha Mafunzo ya Kijeshi Monduli, Brigedia Jenerali  Jackson Mwaseba, alisema kundi la kwanza la Shahada ya Sayansi ya Kijeshi ilifunguliwa Novemba 20, 2017 ikiwa na jumla ya maafisa wanafunzi 158 kati yao wanaume 150 na wanawake 8 .

Alisema maafisa  wote ni Watanzania ambapo maafisa wanafunzi waliofikia hatua yakupata kamisheni ni 143 baada ya wengine 15 kuachishwa mafunzo kwa sababu mbalimbali. 

Brigedia Jenerali Mwaseba alisema kundi la 68, 2020 la mwaka mmoja, kozi ilifunguliwa Februari 25, 2020 ikiwa na maafisa wanafunzi 244, Watanzania 237 huku wa kutoka nchi rafiki wakiwa 7.

Alizitaja nchi hizo rafiki kuwa ni Falme ya Eswatini ikiwa na maafisa wanafunzi wawili na Jamhuri ya Kenya ikiwa na maafisa wanafunzi watano. 

Hata hivyo, Brigedia Jenerali Mwaseba  alisema maafisa wanafunzi 11 walioachishwa mafunzo kwa sababu mbalimbali.

Brigedia Jenerali Mwaseba alisema kuwa maafisa wanafunzi waliofikia hatua ya kupata Kamisheni ni 226 ambapo  kutoka nchi rafiki wako saba.

" Maafisa wanafunzi 17 walijiunga na wenzao baada ya kufanya mafunzo yao nje ya nchi na mchanganuo ni kama ifuatavyo, Burudi mmoja, China wawili, India wanne, Kenya watano, Moroko wawili, Ujerumani wawili na Marekani Afisa mwanafunzi mmoja," alifafanua  Brigedia Jenerali,  Mwaseba na kuongeza.

"Maafisa wanafunzi uliowatunuku kamisheni leo idadi yao ni 386. Wanawake 51 na wanaume 335,".

"Mchanganuo wa elimu ni kama ifuatavyo; Shahada ya Umahiri (Masters) 5, Madaktari wa binadamu na taaluma nyingine za tiba 103, Stashahada ya Uzamili (Postgraduate Diploma) 1, Shahada ya kwanza ya taaluma nyinginezo nje ya tiba 271, Stashahada ya Juu 1, rubani 1 na kidato cha sita 4 ,".

IDADI YA WANACHUO IAA YAONGEZEKA ZAIDI YA ASILIMIA 100

Kwa upande wake, Mkuu wa Chuo cha Uhasibu Arusha, (IAA), Prof. Eliamani Sedoyeka, alimshukuru Rais  Samia kwa nafasi waliyopewa kama chuo kwenye mahafali hayo aliyoyaita ya kihistoria.

 "Tunashukuru kwa mahafali ya kwanza ya kihistoria ya Shahada ya Sayansi ya Kijeshi kwa ushirikiano wa Chuo cha Mafunzo ya Kijeshi Monduli na Chuo cha Uhasibu Arusha, hii ni heshima kubwa sana kwetu," alisema Prof Sedoyeka.

Alisema IAA  kwa mwaka 2019 ilikuwa na wanafunzi 3,400 ambapo kwa idadi imeongezeka kuwa zaidi ya mara mbili kwani kwa sasa  wana wanafunzi zaidi ya 7,000  ikiwa ni ongezeko la zaidi ya asilimia 100. 

Prof Sedoyeka amesema kuwa huo hicho  kina kampasi tatu za Arusha, Babati na Dar es Salaam.