Katika hatua ya kidiplomasia iliyolenga kupoza joto la kisiasa katika ukanda wa Afrika Mashariki, Rais wa Kenya, William Ruto, ameomba radhi kwa niaba ya Wakenya kufuatia mvutano uliozuka baada ya kufurushwa kwa wanaharakati mashuhuri wa Kenya na Uganda waliokuwa nchini Tanzania.
Akizungumza katika ibada ya kitaifa ya maombi iliyofanyika jijini Nairobi siku ya Jumatano, Rais Ruto alisema:
“Kwa majirani wetu wa Tanzania, lau tumewakosea kwa njia yoyote ile, tunawaomba radhi. Ikiwa tumejikwaa, samahani. Na hata wenzetu wa Uganda, kama Wakenya wamewakosea kwa njia yoyote, tusamehe.”
Kauli ya Rais Ruto imekuja baada ya Tanzania kuwazuia na kuwarejesha nyumbani wanaharakati kadhaa waliokwenda kushuhudia kesi ya Tundu Lissu, kiongozi wa upinzani wa CHADEMA anayekabiliwa na shtaka la uhaini.
Miongoni mwa waliozuiwa na kufurushwa ni Martha Karua, mwanasheria wa Kenya na Waziri wa zamani wa Sheria, Boniface Mwangi, mwanaharakati maarufu wa haki za kiraia kutoka Kenya, Agather Atuhaire kutoka Uganda, na Jaji Mkuu wa zamani wa Kenya, Willy Mutunga.
Katika taarifa kwa vyombo vya habari, Martha Karua alieleza wasiwasi wake kuhusu hali ya uhuru wa kiraia katika ukanda:
“Nadhani uhuru wa raia katika eneo la Afrika Mashariki unadorora. Hatuwezi kukubali kurudi nyuma kwa demokrasia kwa kisingizio cha masuala ya ndani ya nchi.”
Kwa upande wake, Boniface Mwangi alieleza kupitia mitandao ya kijamii kuwa yeye na Agather walizuiwa kwa saa kadhaa na kisha kutupwa mpakani:
“Tulizuiliwa kinyume cha sheria, tukahojiwa bila uwakili, kisha tukafukuzwa bila maelezo. Hii ni ukiukwaji wa haki wa waziwazi.”
Agather Atuhaire alithibitisha kupitia chapisho lake kwenye X (zamani Twitter):
“Tulinyimwa haki za msingi tulipokuwa Tanzania. Nilihojiwa vikali na kukaa rumande kwa saa 10. Haya siyo maadili ya Jumuiya ya Afrika Mashariki.”
Hali hiyo ilizua mjadala mkali katika Bunge la Tanzania ambapo baadhi ya wabunge walieleza kughadhabishwa na vitendo vya wanaharakati hao waliodaiwa “kuingilia masuala ya ndani”.
Mbunge wa Iringa Mjini, Jesca Msambatavangu, alieleza kuwa alipokea mamia ya ujumbe kutoka kwa vijana wa Kenya waliokasirishwa na tukio hilo:
“Nililazimika kuzima simu yangu baada ya kupokea ujumbe mwingi wa WhatsApp kutoka kwa Wakenya. Hata hivyo, nawakaribisha kwa mjadala wa hoja. Wajenge kundi la WhatsApp na nitawashirikisha moja kwa moja Jumamosi.”
Aliongeza kuwa:
“Wakenya ni majirani zetu, ndugu zetu, na hatuwezi kuwapuuza. Hatuwezi kuruhusu uhusiano wetu uharibiwe na matamshi ya mitandaoni.”
Mvutano huu ulitibua hisia kali mitandaoni, ambapo baadhi ya Wakenya walidai kwamba Rais Samia Suluhu Hassan alikuwa akiendeleza msimamo mkali dhidi ya wanaharakati. Mapema kabla ya tukio hilo, Rais Samia alinukuliwa akisema:
“Hatuwaruhusu wanaharakati kutoka nchi jirani kuingilia masuala ya ndani ya Tanzania na kusababisha machafuko.”
Kauli hiyo iliibua hisia mseto huku watumiaji wa mitandao ya kijamii kutoka Kenya na Tanzania wakirushiana maneno makali.
Katika ibada hiyo ya kitaifa, ambapo ujumbe wa wabunge kutoka Tanzania na Kenya ulihudhuria pamoja, palijitokeza ishara ya mshikamano mpya. Mbunge wa Dagoretti North, Beatrice Elachi, alitoa wito kwa viongozi na vijana kupunguza joto la majibizano:
“Vijana wetu wamepoteza tumaini na tunaomba pepo aliyeiandama mitandao ya kijamii ashughulikiwe. Tunaomba tusimame pamoja kwa yaliyo na manufaa kwetu kama taifa na vizazi vijavyo.”
Kauli hiyo iliungwa mkono na mchezaji wa zamani wa NFL na mhubiri maarufu wa Marekani, Rickey Bolden, ambaye alikuwa mmoja wa wazungumzaji wakuu kwenye ibada hiyo:
“Vijana wa Gen Z ndio msingi wa taifa la leo na kesho. Kuwakaribisha kwenye meza ya mazungumzo ni hatua ya kwanza kuelekea haki, usawa, na maendeleo.”
Spika wa Bunge la Taifa la Kenya, Moses Wetang’ula, naye alihitimisha kwa kusisitiza kauli mbiu ya ibada hiyo:
“Kaulimbiu yetu leo ni ‘Inuka na Ujijenge Upya’. Ni wakati wa kujenga tena mahusiano yetu, maadili yetu, na mshikamano wetu kama Afrika Mashariki.”
Hadi sasa, Serikali ya Tanzania haijatoa tamko rasmi kuhusu madai ya mateso dhidi ya wanaharakati hao.
0 Comments:
Post a Comment