Rais Hichilema Aonya Mawaziri dhidi ya Tabia ya Kusinzia Katika Mikutano

 

Rais wa Zambia, Hakainde Hichilema, amewaonya mawaziri wake dhidi ya tabia ya kusinzia na kutokujali wakati wa mikutano ya baraza la mawaziri, akieleza kwamba ukosefu wa usikivu na "kujifurahisha" kunahatarisha usalama wa serikali na huduma kwa umma.

Wakati wa hafla ya kuapishwa kwa waziri mpya, Rais Hichilema alisema kuwa tabia ya mawaziri kulala wakati wa mikutano ni ishara ya kutojihusisha na majukumu yao na kwamba hiyo ni tabia isiyokubalika katika utawala wa serikali yake. "Katika baraza la mawaziri mtu analala saa 10, swali ni walikuwa wapi... kama unaweza kuanza kudanganya huko? Kwangu mimi huo ni uhalifu, uhalifu mbaya," alisema Rais Hichilema, akionyesha kutoridhika na tabia hiyo.

Rais Hichilema hakueleza kwa undani alichomaanisha kwa kusema "kujifurahisha", lakini vyombo vya habari vya Zambia vimefasiri maneno hayo kama kumlenga unywaji pombe kupita kiasi na karamu za usiku ambazo zimekuwa zikihusishwa na baadhi ya mawaziri. Alionya kwamba tabia hii inahatarisha kuvuja kwa siri za serikali na kusababisha ucheleweshaji katika utoaji wa huduma kwa wananchi.

"Nimeshauri baraza la mawaziri kwamba lazima tujihusishe. Unapokuwa katika ofisi ya umma lazima uwe na... kujidhibiti, sio kujifurahisha kupita kiasi," alisema Rais Hichilema, akisisitiza umuhimu wa nidhamu na maadili katika utumishi wa umma. Aliongeza kuwa tabia hiyo inaweza kuwa na madhara makubwa kwa serikali na wananchi wa Zambia.

Rais Hichilema alitolea mfano wa Biblia ili kuonya kuhusu hatari ya kutojihusisha na majukumu ya uongozi. "Kwa hiyo unashiriki vipi katika mkutano unapolala? Ujumbe uko wazi kabisa: hupendi mashauri ya baraza la mawaziri kwa niaba ya Wazambia. Kwa hivyo kwa nini unakaa hapo?" aliuliza Rais Hichilema, akionyesha kuwa mawaziri wanapaswa kuwa na utayari wa kutekeleza majukumu yao kwa bidii na ufanisi.

Kwa ujumla, Rais Hichilema ameonyesha msimamo mkali dhidi ya tabia zinazokinzana na maadili ya utumishi wa umma, akisisitiza kwamba serikali yake haitavumilia udhaifu au uzembe kutoka kwa viongozi wake.