IMF Yasihi Kenya Iombe Uchunguzi wa Ufisadi ili Kuendelea Kupata Mikopo Iliyo Kwama

  

Washika dau wakuu katika Shirika la Kimataifa la Fedha (IMF) wametoa wito kwa Kenya kuwasilisha ombi rasmi kwa shirika hilo ili lifanye uchunguzi kuhusu madai ya ufisadi na utawala mbaya, kama hatua muhimu kuelekea kupata mikopo iliyokwama kufuatia migogoro ya kisiasa na maandamano makubwa nchini humo. 

Kwa mujibu wa taarifa kutoka shirika la habari la Reuters, mkopo wa takriban dola milioni 600, chini ya mpango wa IMF, umesimama tangu serikali ya Kenya ilipositisha mswada wa sheria wa kuongeza kodi ambao ulikuwa na lengo la kukusanya dola bilioni 2.7. 

Mswada huo ulisitishwa kufuatia maandamano makubwa ya kitaifa yaliyoongozwa na vijana, wakipinga ongezeko la kodi na kushutumu matumizi mabaya ya rasilimali za umma.

Maandamano hayo, ambayo yalipelekea vifo vya zaidi ya watu 50, yalifichua malalamiko ya wananchi kuhusu ufisadi wa kiwango cha juu, ambapo vijana wengi walilalamikia jinsi kodi zao zilivyotumika kuwafaidisha wanasiasa wanaoishi maisha ya kifahari. 

Shinikizo hili la kijamii limevutia uangalizi wa serikali za Magharibi, ambazo sasa zinataka IMF ifanye tathmini ya madai hayo ya ufisadi na matumizi mabaya ya madaraka kabla ya kutoa msaada wa kifedha kwa Kenya.

Mpango wa awali wa serikali ya Kenya ulikuwa ni kuongeza mapato kupitia kodi mpya, ili kuimarisha uchumi wake ambao umekumbwa na madeni makubwa. 

Hata hivyo, maandamano hayo yaliilazimisha serikali kurudi nyuma, hali ambayo ilisababisha kusitishwa kwa mkopo wa IMF, ambao muda wake unamalizika mwaka ujao.

IMF ina utaratibu wa kufanya uchunguzi wa kina kwenye mataifa yanayokabiliwa na changamoto za kiuchumi, na imekuwa ikifanya tathmini ya masuala kama haya tangu mwaka 2014. 

Hadi sasa, shirika hilo limefanya tathmini kwenye mataifa 14, yakiwemo Ukraine, Cameroon, na Sri Lanka, ambapo uchunguzi wao ulilenga kushughulikia masuala ya uwazi wa fedha, kupambana na ufisadi, na kuhakikisha matumizi sahihi ya mikopo inayotolewa.

Hata hivyo, Wizara ya Fedha ya Kenya haijatoa tamko lolote rasmi kuhusu ripoti hiyo ya IMF na ombi la uchunguzi. 

Hii inakuja wakati ambapo nchi hiyo inakabiliwa na matatizo makubwa ya kiuchumi, huku deni la taifa likiongezeka na kuleta shinikizo zaidi kwa serikali inayotafuta mikopo ya kimataifa ili kusaidia kufufua uchumi wake unaoendelea kudorora.

Serikali za Magharibi zimekuwa zikishinikiza uchunguzi huo wa IMF kama njia ya kulinda misaada ya kifedha na kuhakikisha kuwa rasilimali za umma hazitumiki vibaya, jambo ambalo linaonekana kuwa la muhimu ili kurejesha imani ya kimataifa kwa utawala wa kifedha wa Kenya. 

Katika kipindi kijacho, inaonekana kuwa uamuzi wa Kenya kuhusu kuomba uchunguzi huo wa IMF unaweza kuathiri mustakabali wa msaada wa kifedha unaohitajika kwa haraka, huku serikali ikikabiliwa na shinikizo la ndani na la kimataifa la kuboresha utawala wa kifedha na uwajibikaji.