Vijana wa BAVICHA Zaidi ya 281 Wanashikiliwa na Polisi Wakielekea Kuadhimisha ya Siku ya Vijana

 

Katika hali isiyo ya kawaida, vijana zaidi ya 281 wa Chama Cha Demokrasia na Maendeleo (CHADEMA) wanashikiliwa na Jeshi la Polisi katika vituo mbalimbali nchini. Tukio hili linaendelea kuibua maswali kuhusu haki za kikatiba na uhalali wa hatua hizi. 

John Mrema, Mkurugenzi wa Itifaki, Mawasiliano na Mambo ya Nje wa CHADEMA, ametangaza kwamba vijana hao wanashikiliwa katika maeneo yafuatayo: Temeke (11), Mbeya (10), Iringa Kituo cha Kati (104), Migori Ismani (35), Makambako (74), na Mikese Morogoro (48). 

Kukamatwa kwa vijana hawa kunahusishwa na hatua zilizochukuliwa na Jeshi la Polisi na Msajili Msaidizi wa Vyama vya Siasa, Sisty Nyahoza, ambao walizuia vijana wa CHADEMA (BAVICHA) kuadhimisha Siku ya Vijana Duniani, inayofanyika kila mwaka tarehe 12 Agosti. 

Mrema ameeleza kwamba hatua hizi ni kinyume na haki za kikatiba za wananchi, kwa kuwa haijawahi kuwa kosa kusafiri kutoka eneo moja la nchi kwenda lingine kwa madhumuni ya maadhimisho ya siku muhimu.

 CHADEMA inalaani vikali hatua za ubaguzi zilizochukuliwa na Msajili Msaidizi wa Vyama vya Siasa pamoja na Jeshi la Polisi, akisema kuwa hatua hizi zinakiuka haki za kikatiba za vijana.

Mrema amemtaka Mkuu wa Jeshi la Polisi kuwaachia vijana wote waliokamatwa ili waendelee na safari yao ya maadhimisho. Anasisitiza kuwa hatua ya kuwashikilia bila sababu za kisheria ni uvunjaji wa Katiba.

Mrema amehoji hatua za Jeshi la Polisi katika kufungua majalada ya kesi za uongo, kama ilivyo katika kesi ya 'Usafirishaji Haramu wa Binadamu' dhidi ya vijana, akionyesha kuwa ni wazi polisi wanawabambikia kesi.

Mrema amemwita Rais Samia Suluhu Hassan na Amiri Jeshi Mkuu kuingilia kati na kuhakikisha vijana wa CHADEMA wanaruhusiwa kushiriki maadhimisho hayo. Anasema kwamba kutokufanya hivyo kutakuwa ni kuachana na ahadi za R4 alizozisema Rais.

Mrema anasisitiza kuwa mpaka sasa, vijana zaidi ya 281 wanashikiliwa na Jeshi la Polisi, huku maadhimisho ya Siku ya Vijana yakikaribia. Hali hii inatia hofu kuhusu mwelekeo wa haki za kikatiba na uhuru wa mikusanyiko nchini.