Kashfa ya Video za Ngono za Baltasar wa Equatorial Guinea: Je, Inahusiana na Urithi wa Uongozi?

 

Katika kipindi cha wiki mbili zilizopita, mamia ya video za ngono zinazomhusisha mtumishi wa serikali wa ngazi ya juu wa Equatorial Guinea, pamoja na wanawake tofauti, zilisambaa kwenye mitandao ya kijamii. 

Video hizo zilifurika kwenye mitandao ya kijamii, na kuwashtua watu katika nchi hiyo ndogo ya Afrika ya Kati na kwingineko.

Wanawake wengi waliorekodiwa walikuwa wake na jamaa wa watu walio karibu na Baltasar Ebang Engonga, ambaye pia anajulikana kama "Bello" kutokana na “muonekano wake mzuri”. 

Engonga ni mpwa wa Rais Teodoro Obiang Nguema, ambaye amekalia kiti cha urais kwa zaidi ya miongo minne, tangu alipoingia madarakani mwaka 1979.

Ingawa baadhi ya wanawake wanaonekana walijua kuwa wanarekodiwa wakati wakifanya ngono na Engonga, kumekuwa na mtazamo kwamba uvujaji huu wa video za ngono ulilenga kumdhoofisha ama kumuaibisha mtu aliye katikati ya dhoruba kubwa ya kisiasa. 

Hii ni kutokana na uhusiano wake na Rais Obiang, ambaye mwenyewe amekosolewa vikali kwa rekodi ya haki za binadamu na utawala wa kimabavu.

Kashfa hii inajitokeza wakati ambapo uchumi wa Equatorial Guinea unakumbwa na changamoto kubwa, hasa kutokana na kupungua kwa akiba ya mafuta ambayo imekuwa nguzo kuu ya uchumi wa nchi hiyo. 

Ingawa uchumi uliongezeka kwa kasi katika miaka ya mwanzo ya utawala wa Obiang, sasa zaidi ya milioni 1.7 ya raia wa nchi hiyo wanakabiliwa na umaskini mkubwa.

Equatorial Guinea pia inakumbwa na changamoto nyingine kubwa – kukosekana kwa uhuru wa vyombo vya habari na haki za kisiasa. 

Serikali imekuwa ikikandamiza upinzani, na wanaharakati wengi wamefungwa au kuhamia uhamishoni.

Kwa upande mwingine, video hizo za ngono ziliibuka baada ya Bwana Engonga kukamatwa tarehe 25 Oktoba kwa tuhuma za ubadhirifu wa pesa kutoka kwenye hazina ya serikali. 

Inadaiwa kwamba alihusishwa na akaunti za siri zilizowekwa katika Visiwa vya Cayman. 

Aliwekwa kwenye gereza maarufu la Black Beach mjini Malabo, na simu na kompyuta zake zilinaswa na vikosi vya usalama.

Hivi karibuni, video hizo zilianza kuonekana kwenye mitandao, na kuibua maswali mengi. 

Tovuti ya habari ya Diario Rombe ilichapisha kuhusu kashfa hii, na kusema kuwa “mitandao ya kijamii yashtushwa kwa kuvuja kwa picha na video chafu". 

Katika sehemu nyingine, video hizo zilianza kuonekana kwenye mtandao wa Telegram, na kisha zililipuliwa kwenye vikundi vya WhatsApp nchini Equatorial Guinea, ambapo zilisababisha taharuki kubwa.

Engonga alitambuliwa haraka katika baadhi ya video hizo, akionekana na wanawake wakiwemo jamaa za rais na wake za mawaziri na maafisa wakuu wa kijeshi. 

Ingawa serikali ilijaribu kudhibiti usambazaji wa video hizo kwa kuzuia mawasiliano, kashfa hii ilizidi kushika kasi.

Makamu wa Rais Teodoro Obiang Mangue, ambaye ni mtoto wa rais na ambaye pia anahusishwa na kashfa mbalimbali za kifahari, alikiri kuwa ni "kashfa kubwa iliyotikisa serikali" na alielezea juhudi za serikali katika kubaini chanzo cha video hizo na kuwachukulia hatua waliohusika. 

Alisema kwenye mtandao wa X, “Hatuwezi kuendelea kuangalia tu familia zikisambaratika pasipo kuchukua hatua yoyote.”

Pamoja na kuwepo kwa uchunguzi kuhusu tuhuma za ubadhirifu, wanaharakati wanadhani kuwa tuhuma hizi na kashfa ya ngono inahusiana na siasa za urithi. 

Engonga ni mtoto wa Baltasar Engonga Edjo'o, ambaye ni mkuu wa jumuiya ya kiuchumi na kifedha katika eneo la Cemac na anajulikana kuwa na ushawishi mkubwa nchini humo.

Nsang Christia Esimi Cruz, mwanaharakati wa Equatorial Guinea ambaye sasa anaishi uhamishoni London, alisema: "Tunachoona ni mwisho wa zama za rais wa sasa, na kuna mengi Zaidi na haya ni masuala ya mvutano wa ndani tunaoshuhudia". 

Alidai kuwa Makamu wa Rais Obiang alikuwa akijaribu kumuondoa kisiasa "mtu yeyote ambaye angeweza kupinga urithi wake."

Cruz aliongeza: "Equatorial Guinea ina changamoto nyingi zaidi kuliko kashfa hii ya ngono. Hii ni dalili tu ya ugonjwa, sio ugonjwa wenyewe. Hii inaonyesha tu namna mfumo ulivyo mbovu." 

Kwa hivyo, kashfa hii ya ngono inaonekana kuwa ni sehemu ya mchakato mkubwa wa siasa za urithi nchini Equatorial Guinea, ambapo fitina na vita za kifamilia zinashika kasi, huku taifa likikumbwa na changamoto za kiuchumi, haki za binadamu, na utawala wa kifalme.