INAYOVUMA, MAGUFULI ATIKISA DUNIA: Hizi ni Media kubwa Duniani zilizoripoti habari kuhusu kauli ya Rais Magufulu kuwazuia wanafunzi wanaopata ujauzito kutoendelea na masomo

PARS TODAY , TEHRAN-IRAN 

Kauli ya Rais Magufuli kuhusu wanafunzi wanaopata mimba yawakasirisha wanawake"

"Wanawake wamekasirishwa na matamshi ya Rais wa Jamhuri ya Muungano wa Tanzania John Magufuli ya kupiga marufuku kurejea shule wasichana wanaopata ujauzito hata baada ya kujifungua.

Wanaharakati mbalimbali wa masuala ya wanawake wamekosoa kauli hiyo na kumtaka Rais Magufuli kuomba msamaha kwa matamshi hayo. Aidha baadhi ya wanaharakati wa masuala ya eneo wameitaka serikali ya Tanzania kutazama upya sheria inayomfukuza shuile msichana mwanafunzi anayepata mimba. 

Shirika moja la wanawake barani Afrika limemtaka Rais Magufuli aombe msamaha na wakati huo limewataka wanawake kusimama na kuipinga sheria hiyo ya Tanzania. 

Sheria iliyopitishwa mwaka 2002 nchini Tanzania inaruhusu kutimuliwa wasichana wanaopata mimba wakiwa shuleni.

Wanafunzi wasichana wa Shule ya Sekondari ya Weruweru ya Moshi Tanzania

Sheria hiyo inasema kuwa, wasichana wanaweza kufukuzwa shuleni kwa ''makosa yanayokiuka maadili na ndoa''.

Ni kwa muda sasa makundi ya haki za wanawake yamekuwa yakiishinikiza serikali ya Tanzania kubadilisha sheria hiyo, ingawa mpaka sasa juhudi hizo hazijazaa matunda. 

Mjadala kuhusiana na sheria hiyo umeibuka tena nchini Tanzania baada ya hivi juzi Rais Magufuli kunukuliwa katika mkutano wa hadhara akiwaonya wasichana wa shule kwamba ''unaposhika mimba mambo yako yamekwisha''.

Rais wa Tanzania aidha alisema, wanaume wanaowatia mimba wasichana wa shule pia nao wanapaswa kuhukumiwa kifungo cha hadi miaka 30 na kuweka nguvu zao walizozitumia kuwatunga mimba wasichana hao kulima wakiwa jela." pars today

BBC Swahili , LONDON - UINGEREZA "

Matamshi ya Magufuli kuhusu wasichana wa shule waliotungwa mimba yawakasirisha wanawake Tanzania" 

"

Rais wa Tanzania John Magufuli ameshutumiwa kwa matamshi yake kwamba wasichana wanaojifungua hawafai kuruhusiwa kurudi shule.

Ombi la mitandao ya kijamii limewekwa huku shirika moja la wanawake barani Afrika likitoa hamasa ya kumtaka rais Magufuli kuomba msamaha kwa matamshi hayo.

Bwana Magufuli aliwaonya wasichana wa shule katika mkutano wa hadhara siku ya Jumatatu kwamba ''unaposhika mimba mambo yako yamekwisha''.

Sheria iliopitishwa mwaka 2002 inaruhusu kutimuliwa kwa wasichana waliotungwa mimba wakiwa shuleni.

Sheria hiyo inasema kuwa wasichana wanaweza kufukuzwa shuleni kwa ''makosa yanayokiuka maadili na ndoa''.

• Magufuli: Wasichana wanaojifungua hawatarudi shuleni

Makundi ya haki ya wanawake yamekuwa yakiishinikiza serikali kubadilisha sheria hiyo.

Magufuli ambaye alikuwa akizungumza katika mkutano wa hadhara katika mji wa Chalinze ,takriban kilomita 100 magharibi mwa mji wa Dar es Salaam alisema kuwa kina mama hao wachanga hawatasoma vyema iwapo wataruhusiwa kurudi shule.

Baada ya kupiga hesabu ,atamtaka mwalimu wake kwenda nje ili kunyonyesha mwanaye anayelia.

Alisema kuwa wanaume wanaouwatunga mimba wasichana wa shule pia nao wanapaswa kuhukumiwa kifungo cha hadi miaka 30 na kuweka nguvu zao walizozitumia kuwatunga mimba wasichana hao kulima wakiwa jela." BBC